Республиканыӊ наркология диспансериниӊ психиатр-нарколог эмчизи Аяна Намажаповна арага солуур бүдүмелдерниӊ кадыкка хоразыныӊ дугайынга хамаарыштыр тайылбырны кылган.
Арага солуур бүдүмелдер (суррогаттар) дээрге хүн бүрүде амыдыралга болгаш техниктиг сорулгаларга ажыглап турар, ынчалза-даа ижеринге таарышпас спирттиг суглуг бүдүмелдер-дир. Оларны колдуунда-ла эзиртиир суксуннарны садып шыдавазы биле азы олар чок турда ажыглап турар.
Арага солуур бүдүмелдер арагадан дыка айыылдыг, чүге дизе оларның составында метил спирт (метанол), альдегид, этиленгликоль дээш оон-даа өске өлүмнүг химиктиг бүдүмелдер бар. Бо химиктиг бүдүмелдерниң бичии-ле кезии безин кижиниң кадыынга хора чедирип, өлүмге безин чедирип болур.
Арага солуур бүдүмелдер-биле хоранганыныӊ демдектери аңгы-аңгы болгаш бүдүмелдиң тургузуундан болгаш ижип турар хемчээлинден хамааржыр. Метанолдуг бүдүмелдерден хорананыыры дыка дүрген болур. Метанол дораан-на ханче сиңип, бүүрек, баар, нерви системазынга хора чедирип турар. Көрүжү кошкаары, шуут караа көрбес, дүвүрелдер, угаан-медерел чидирии, дыртар аарыы, чүрек аарыы, кома тыптып болур.
Арага солуур будумелдер-биле хорананганының баштайгы демдектери көстүп кээрге, дораан дүрген дуза машиназын кыйгырар херек.
Арага солуур бүдүмелдер-биле хорананыырынын удур хемчеглери:
• Эң бүзүрелдиг удур хемчеглер дээрге араганы, арага солуур будумелдерни кажан-даа ижип болбас.
• Арага садып-саарарынга тускайлаң эвес, чигзиниглиг черлерден арага садып албас.
• Акцизный марказы чок, чедир хагдынмаан аастыг, шилдиӊ адаанда чигзиниглиг чөкпектиг болза ону садып ап болбас.
Спирт холумактыг чүүлдерни болгаш эзиртир суксуннарны лицензия, чөпшээрел чок, бажыңындан азы квартиразындан, азы бодунга ап алгаш чедирип берип, садып-саарары Федералдыг хоойлунуң негелдези-биле хоруглуг.
️Арагадан ойталаӊар, кадык болуӊар!
️