Эмчи ажылдакчыларынга хамаарыштыр сеткилиниң ханызындан өөрүп четтириишкинниң сөстерин үлежир буянныг рубрикавысты #Спасибо_доктор#Четтирдим_эмчи уламчылаар-дыр бис. Республиканың консультативтиг-диагностика төвүнде наркология кабинединиң фельдшеринге өөрүп четтириишкинни бөгүн парлап тур бис.
Чолаачының шынзылгазын алырда эмчи шинчилгезин эртери дыка чурумнуг болгаш, бедик деңнелде кылып кааны эки-дир. Психиатр-нарколог эртерде хондур-дүндүр оочурлаар турган эвес ийикпе. Ам горячая линиялыг, долгаптарга записьтеп каар, дыка-ла таарымчалыг апарган-дыр.
Гагаринада поликлиникада шупту чуве чурумнуг , оочур хөй-даа болза дурген-дурген эртириптер, эмчилер ажылынга харысаалгалыг дыка-ла эки-дир.
Востокта поликлиникада нарколог эмчиниң фельдшери Роберт Альбертович чеже -даа улус хөй болза эвилең-ээлдек, дыка дүрген ажылдаар, дузааргак фельдшер болду. Ындыг хөй улус хүлээр кабинетке шылап, бужурганып калгы дег, кижи бүрүзү-биле биче сеткилдиг, оочур-даа чыып алгаш турбас шудургу фельдшер чорду. Нарколог эмчизинге шуптузун белеткеп бээр, эмчи чүгле түңнелин салыр, мындыг фельдшерлиг боорга эмчизинге эң-не улуг чедиишкин. Эмнелге шугумунда ажылдап турар кижи бүрүзү эриг баарлыг, биче сеткилдиг, дузааргак чоруур болзувусса-ла аарыг улус сегиичел боор, өөрүүр боор.
Ынчангаш ынак Тывавыс, кадык-камгалал салбыры хөгжүп-сайзырап турарынга өөрүп тур мен. Эр-хейлер, ам-даа бурунгаар.